AZCMS
AZCMS AZCMS AZCMS
 

This email address is being protected from spam bots, you need Javascript enabled to view it به وب سایت ادبی - تحقیقی رضا همراز خوش آمدید. لطفا با درج نظرات و پیشنهادات خود ما را در پربارتر نمودن این وب سایت یاری نمائید. This email address is being protected from spam bots, you need Javascript enabled to view it

 
 
AZCMS AZCMS AZCMS
AZCMS AZCMS AZCMS AZCMS AZCMS AZCMS AZCMS AZCMS AZCMS
 

منوی اصلی سایت

خبرخوان ها

    
آذربايجان ائل موسيقي‏سي ساحه‏سينده خلق آرتيستي عاشيق حسين (جوان)
نوشته شده توسط صمد صباحی   
14 بهمن 1389 ساعت 22:11

آذربايجان كلاسيك ائل و عاشيق ادبياتينين ياراديجيسي و ايفاده‏چيسي اولان عاشيقلار ياراتديقلاري قبلي اثرلرله آذربايجان ادبياتينين انكشافي تاريخينده بؤيوك و مهم رول اويناميشلار. ايسته‌ر ائل ،ايسته‏رسه‏ده عاشيق ادبياتينين ياراديجيلاري ايللر اولولوخالقيميزين اوره‏گينده قوربان آرزو و نيسگيللري ترنم ائده‏ره‏ك، دؤشلرينه باسديقلاري صدفلي سازايله بوتون امكلريني خلق ايشينه صرف ائتميش و خلق ايله موسيقي صورتده تماسدا اولموشلار.

كلاسيك ادبياتيميزدا اولدوغوكيمي عاشيق ادبياتيندا بير سيرا صنعت‏كارلارين دگرلي اثرلرينه تصادف ائتمك اولاركي، اونلارين آدي و خاطره‏لري متفكر و شاعر و يازيچيلاريميز خلقيميزين قلبينده ابديت قازانميشدير.

آذربايجان عاشق ادبياتينين افتخاري ساييلان بؤيوك صنعتكار عاشيق علي عسگرين آديني

اوخوجولاريميزا خاطرلاتساق كفايت ائدر.

معاصر دؤريميزده‌‏ده دولغون و يوكسك عاشيق ادبياتيندان الهام آلان ائله استعدادلي عاشيقلارا تصادف ائديليركي اونلار خلقيميزين حيات و مبارزه‏لريني، ملي عادت و عنعنه‏لريني اؤز شعرلرينده انعكاس ائتديرمكله ياراتديقلاري گؤزه‏ل اثرلرله ادبيات خزينه‏ميزي زنگيلشديريرلر بو قسم استعدادلي و سئويملي عاشيقلاردان بيريده هامينين تانيديغي حورمت بسله‏ديگي خلق آرتيستي عاشيق حسين (جاوان) دور. عاشيق حسين جاوان 1294 نجي ايل شمسيده قارا‏داغ‏دا گرمه‌‏دوز محالينين اوت كندينده يوخسول بير اكينجي عائله‏سينده آنادان اولموشدور.

دوغولدوغو گوندن يئتيم قالميش حسين آناسي ايله بيرليك‌ده آجي حيات كئچيرميش و خلقيميزين مبتلا اولدوغو فلاكتلي گونلرينين شاهدي اولموشدور.

گؤزه‏ل و ملاحتلي سه‌سه مالك اولان عاشيق حسين هله كيچيك ياشلاريندا ايكن عاشيق ادبياتيله ماراقلانديغيندان عاشيق علي‏عسگر و ساير عاشيقلارين سؤزلريني بؤيوك ذوق ايله اؤيره‏نير و نهايت آيريلماز صورتده باغلانديغي عاشيق‌ليق صنعتيني اؤزونه اختصاص سئچير.

عاشيقليق عشقينه دوشن حسين مفتون اولدوغو عاشيقليق صنعتيني دريندن منيمسه‌مك مقصديله اوستاد عاشيق علي عسگرين قارداشي اوغلو عاشيق موسي و اوغلو عاشيق طالبين يانيندا آلتي ايل شاگردليك ائديكده‏ن سونرا مركب عاشيقليق صنعتينين ان درين و اينجه خصوصيتلرينه قدر اويره‏نير و مستقل بير صنعتكار اولاراق عاشيقليغا باشلايير.

عاشيق حسين هله ياراديجيليغينين ايلك دؤورلرينده يازديغي گؤزه‏ل قوشمالاري، مخمس، تجنيس، دوداق دگمز، گرايلي، گؤزه‏ل له‏‏مه، جناس، گئدرگلمز و دوبيتيلريله خلقيميزين محبت و رغبتي‌ني قازانماغا باشلايير. لاكين اونون بو قيمتلي اثرلري خلقين مالي اولا بيلمه‏يير. ملي مدنيتيميزه اولدوغوكيمي عاشيقليق صنعتينه‏ده حقارت گؤزيله باخان سابق فاسد ايران دولتي آذربايجانين قوه‌لري اوچون لاقيد مناسبات بسله‌ديگيندن باشقا استعدادلي صنعتكارلاريميزكيمي عاشيق حسين‏ده عاشيقليقدان ال چكه‏ره‏ك قهوه‏خانه آچماغا، باققال‏ليق ائتمگه مجبور اولور لاكين نه احتياج، سيخينتي، تحقير، استوانه‏ده گوبود بهتانلار اونو پرستيش ائتديگي صنعتينده‏ن آييرابيلمه‏يير.

صدفلي سازي اونون آغير گونلرينده همدمي اولور. حياتينين آغير دقيقه‏لرينده اؤز سيرداشي اولان سازيني دؤشونه باساراق، اوره‏ك دردلريني اونا سؤيله بير سازينين تئللرينده‏ن قوپان آهنگدارصدالار قلبينده ياشاماق اوچون اوميدوني دويغولار دوغورور. او «ساز» شعرينده يازير :

«سنكي منده‌‏ن سيرداشسان سوروش درديم آراساز

درديم چوخدور. درمان يوخدور، هانا واريم بيلمه‏ره‏م

آزاد ائله‏ين حكيمينه يئتر بير دواراساز»

عاشيق حسين بو شعرينده خلقيميزين فلاكت گونلرينده آزادليغا اولان جوشغون آرزولاريني جسارتله ايفاده ائدير. او، بؤيويوب بوي آتديقجا قلبينده‏كي ديله‏ك و آرزولاريدا بويورور.

او خلقيميزين كئچيرديگي آجي سرگذشتلرين و فلاكتلرين آچيلان قاپلارين دويون بوتون امك و ياراديجيليغين خلقيميزين آزادليغي و گله‏جك خوشبختليگي ايشينه صرف ائدير.

شهريور حادثه‏سينده‏ن سونرا بوتون ياخين شرق اؤلكه‏لرينده اولدوغوكيمي آذربايجاندادا سرعتله انكشاف ائده‏ن دموكراتيك حركاتدان الهام آلان عاشيق حسين خلقيميزين گونده‏ليك حياتي مسئله‏لري اطرافيندا دولغون و قيمتلي اثرلر يازماغا باشلايير، كؤرپه ياشيندان سئيسيغينديغي نه‏غي و اوره‏گينين بوتون آجيلاريني يودوغو سازيني پولاد سينه‏سينه باساراق، خلقيميزين درديني آچير اؤز شيرين شعرلري‏ايله خوشبخت‏ گله‏جگيميزين خبريني وئرير.

 

او، آزادليق سئوه‌ن دموكراتيك خلقلر، تجاوزكار آلماغا ايمپرياليزمي ايله اؤلوم – ديريم مبارزه سي آپارديغي تاريخي گونلرده فاشيزم عليهينه كسگين شعرلر يازير.

عيني زماندا صلحون داياغي اولان قهرمان قيزيل اوردونون فاشيزم اوزه‏رينده چالديغي هر تاريخي غلبه‏ني آلقيشلايير. و اونون شانلي سركرده‏سي بؤيوك مناليه اولان سونسوز محبتيني «آنا» شعرينده گؤرمك اولار :

«كؤنوللر آرزوسو ديللر ازبري

سن‏سن مظلوملارا مهربان آنا

آزاد اؤلكه‏لرده بير باغ اكيبسن

اولوب هر بوجاغي گلستان آنا»

قلبينده وطن و خلقينه، آزدليق و دموكراتيايا سونسوز محبت بسله‏ين عاشيق حسين جاوان يازديغي آلاولي شعرلريله دؤروموزون مبارز شاعرلري سيراسينا كئچمه‏گه موفق اولور.

او،خلقيميزين دموكراتيا و آزادليق اوغروندا آپارديغي آمانسيز مبارزه گونلرينده قوللي شعرلر يازير.

او سازيني اسلحه، سؤزلريني اسيه گلله عوضينه ايشله‏ده‏ن مبارز بير علسگردير.

آذربايجاندا دموكراتيانين غلبه‏سينده‏ن روحلانان عاشيق حسين جاوان «نوروز بايرامي» شعرينده يازير :

«عزيز دوستلار خوشدور حاليم، چاغدير دماغيم منيم

ميلتي شاد گؤروره‏م گولور دوداغيم منيم

عاشيق حسينين سئوينجي فردي بير سئوگيدن عبارت دگيل، غالب گلميش قهرمان خلقيميزين سئوينجيدير.

خلقيميزين قدرت و قوتينين يئنيلمزليگينه ايمان گتيرن عاشيق حسين قازانديغيميز آزادليغيميزي گؤز به‏بگي كيمي قوروماغي اؤزونه ملي شرف و مقصد قوياراق «قدرتيميزوارـ شعرينده يازير :

بيزيم كيمده‌ن قورخوموز وار هاميميز بير جان كيمي

الده سيلاح دايانميشيق باخ بير نگهبان كيمي

عاشيق حسين بو شعريله اوزون مبارزه‌لر نتيجه‌سينده قازانديغيميز آزادليغيميزي مدافعه ائتمك اوچون خلقيميزين بير جان كيمي حاضر اولدوغونو افاده ائدير.

او ملي عنعنه‌لريميزه حورمت بسله‌ين، آنا ديليميزين گؤزه‌لليگينه پرستش ائديب وطن و خلقيندن الهام آلان وطنيميزين شن و گؤزه‌لليگينه اولان آلاولي بير وطن‌پرور دور. «آنا توپراغيم» آدلي شعرينده عاشيق حسين وطنه و آناديليميزه اولان سونسوز محبتين افاده‌سيني گؤروروك.

باشينا دؤندوگوم آنا توپراغيم

نه گؤزه‌ل شيريندير ديللرين سنين

گئتدي قارا ايللر بيرده گلمه‌سين

گؤزه‌ل گلسين ايلده‌ن ايللرين سنين

اونون ياراديجيليغين گؤزه‌ل خصوصيتلرينده‌ن بيريده شعرلريني گونون حياتي و مبارز مسئله‌لريله علاقه‌لنديرمه‌سيدير.

او دموكرات فرقه‌ميزين ايره‌لي سوردوگو تاريخي قرارلاري گئنيش خلق طبقه‌لري آراسيندا تبليغ ائتمه‌گي اؤزونه اساس هدف قرار وئره‌ن صنعتكارلاردان دير اونون يازديغي شعرلرده ائله قيمتلي پارچالارا تصادف ائديلير كي موضوعون حياتي‌ليگي و اجتماعي وسعت نقطه‌نظرينجه عاشيق ادبياتيميزين ان قيمتلي اثرلري سيراسينا داخل ائديلمه‌گه لايق دير. اونون يازديغي داستانلار ايچريسينده ستارخان داستانيني قيد ائتمك كفايت ائدر.

ايسترسه مندرجه ايسترسه‌ده شكل اعتباريله تبريز شاعرلري ايچريسنده ملي ادبياتيميزه يئني‌ليك گتيره‌ن شاعرلرين بيريده عاشيق حسين‌دير.

عاشيق حسين جوانين ياراديجيليغين چيچكله‌نن دؤرو قهرمان قيزيل اوردونون ايراني ترك ائتمه‌سي وقتينه تصادف ائدير.

مدنيت اوردوسو اولان قيزيل اوردونون آذربايجاني خصوصا تبريزي ترك ائتديگي گونو هئچ بير قلب اونودابيلمز.

او گون خلقيميزين عاليجناب قيزيل اوردونون وطنيميزي ترك ائتمه‌گيندن و بو آيريليقدان آلديغي درين تاثيراتين بديعي افاده‌سيني اؤز شعرلرينده ترنم ائده‌ن شاعرلريميزدن بيريده عاشيق حسين جاوان ايدي.

خلقيميزين قيزيل اوردويا بسله‌ديگي جوشغون محبتين پارلاق بديعي افاده‌سيني ره آل قلميله اؤز شعرلرينده مهارتله افاده ائده‌ن عاشيق حسين جاوان ايكي صميمي قونشو اؤلكه خلقلر آراسيندا يارانميش و گوندن گونه محكم‌له‌نن دوستلوق و مهربانليقين نمونه‌لريني سئچير.

او قيزيل اوردوايله آيريليغيميزدان خلقيميزين كئچيرديگي آجي اؤره‌ك چيرپينتيلاريني، غم و كدريني افاده ائدير.

اونون قيزيل اوردونون وطنيميزي ترك ائتمه‌سينه يازديغي شعرلر ايچريسينده بيريني اوخوجولاريميزا خاطرلاساق كفايت ائدر. او، «گئتمه» شعرينده :

ايسته‌گلي سئوگيليم عزيز مهربان

گل مندن آيريلما، آرالي، گئتمه!

اوره‌ك غمگين اولار دونياده‌سن سيز

كسيلر قلبيمين قرالي گئتمه!

عاشيق حسين جوانين بو كدري خلقيميزين كدري دير : عاشيق حسين جوانين ياراديجيليغي اولدوقجا دولغون و مركب‌دير.

اوخوجو اونون بير و يا ايكي شعريني اوخوماقلا اونا قيمت وئره بيلمز اونون ياراديجيليغي فواره‌ ائدن چشمه كيمي قاينايير : او بير عاشيق و شاعر اولماقلا برابر عين زاماندا صحنه‌ميزي زينتلنديرن مقتدر بير آكتوردور.

فرقه‌ميز و دولتيميز عاشيق حسين جوانين ياراديجيليغي و خدميتينه يوكسك قيمت وئره‌ره‌ك‌: 21 آذر مدالي‌ايله تلطيف ائتمك‌له برابر خلق آرتيستي آديله شرفلنديرميشدير.

عاشيق حسين يوكسك تالاتا مالك دير. اونون روحي وطن و آزادليغا اولان عشقي و مقدس خلقه چيرپينان قلبي پاك دويغولارلا دولودور.

بيز عاشيق حسين جوانين گله‌جگيندن بؤيوك اميدلر گؤزله‌ييريك. اونون ادبيات خزينه‌ميزه داها قيمتلي داها دولغون بديعي اثرلر ياراداجاغينا امينيك.

 

نوشتن نظر
نام:
عنوان:
BBCode:Web AddressEmail AddressBold TextItalic TextUnderlined TextQuoteCodeOpen ListList ItemClose List
نظر:

كد:* Code
من اين نظر را دوستانه جهت تماس ارسال ميكنم


بيننده: 1535

  نظرات (1)
RSS نظرها
 1 نوشته شده توسط شهر مهتاب, 06 اسفند 1389,ساعت 21:42:03
با سلام  
من تو پایان نامه ام در زیر عنوان برگ علوی،کم هم دارم از شخصیت دکتر ارانی می گم،مطلبتون تو این زمینه برام جالب بود

Powered by AZCMS

 
   

تصاویر

آمار سایت

 

 

معرفی کتاب

 
 
 
 
AZCMS AZCMS AZCMS AZCMS AZCMS AZCMS AZCMS AZCMS AZCMS
AZCMS AZCMS AZCMS
 
   
 
AZCMS AZCMS AZCMS
AZCMS AZCMS AZCMS
   
AZCMS AZCMS AZCMS