جوما آخشامی اوستاد حاج محمد امین سلطان القرائی له گوروشدوکده ؛ اونلاردان ائشیتدیم کی دئییرلر : " آی بالا ائشیددیز کی دوقتور بوداغی ده وفات ائدیب ؟" بو آجی خبری ائشیددیکده اینانار – اینانماز دئدیم :

- بیزیم دوقتور بوداغی ؟

- هه ؛ دوقتور بوداغی

- عجب . هاچان ؟

- گومان کی سیراغا گون . آنجاق بو گون اونون یاس توره نی ششگلان خیاوانیندا امین الوزراء مچیدینده قورولاجاق .

بو آجی خبر منی دوغرودان – دوغروسو یامان سارسیتدی . نییه کی هردن بیر او رحمتلی ایله بیر گه دولانیب ؛گاهدان ایسه چای لاشاندا ؛ یاشایشینین نه درجه ده چتین اولدوسوندان من بیر نئچه دونه ائشیدیب ؛ تاسف لر یئمیشدیم .

رحمتلی دوقتور غلامرضا بوداغی نی ایلک کره تربیت خیاوانیندا دوستلارین بیری ایله دولاندیقدا گوروب تانیش اولموشدوم . بو دوستلوق داها سونرالار دوام تاپیب و نئجه دئییرلر محکم لنمیشدی . هردن اونلار منه زنگ آچیب ؛ هردن ایسه من اونلارا زنگ آچیب کئف – احوال لاشاردیق . اونون واختینین بیر چوخ حیصصه سی یازیب اوخوماق و قوجامان آنا سیندان پرستار لیق ائتمه یه حصر اولوناردی .

رحمتلی بوداغی تبریزده دوغولوب ؛ بورادا بو ی آتسادا ؛ انقلابدان سونرا عالی تحصیلات آلماق ایچون اوتای آذربایجانا گئدیب اورادا درس اوخویا – اوخویا مطبوعات لادا علاقه ساخلامیشدیر. آنجاق دوقتوراسین بیتیردیکدن سونرا یئنه دوغما یوردونا دونور. بیر زامان آورارا – سفیل قالسادا ؛ مطبوعاتا ساری چکیلیب ؛ مهد آزادی نین کورپو آدلی اوزل سایلاریندا قلم چالیر . بو ایش لرله برابر ائله مهد آزادی نین اوزل صحیفه لری اولان آدینه عنوانلی نومره لرده ده آذربایجان ادبیاتینا دایر تورکجه – فارسجا گوزل ؛ عین حالدا آخیجی مقاله لر یازیر .

همین ایللر اعتبارا تبریزده مهندس موسوی نین باشقانلیغی ایله اختر هفته لیی نشر اولماغا باشلادیقدا ؛ اورایا چاغریلیب ؛ تورکجه صحیفه لرینین مسئولیتین بوینونا آلیر . چوخ گوزل ؛ بوشقابا قویمالی ؛ عین حالدا خالق به یه نن بیر صحیفه لر توپلایب نشر ائدیر . بو ایش لرله برابر آرا – سیرا باشقا یئرلرده ده اونون یازی لاری گورونور . نه یازیق کی اختر دایاندیقدا بونوندا تقریبا ال – قولو سووموشدور . مطبوعاتدا اونون حضورو آز گورونور ؛ یئری بوش لوغو حیس اولونوردو .

سون آی لاردا بیر نئچه دونه بیله سینه زنگ آچیب کئفین خبر آلماق ایسته دیم . تاسف له بیر جواب ائشیده بیلمه دیم . آنجاق همه شه اونونلا اولاندا بیر شئی منیم ایچون معما کیمی ایدی . اودا بوکی اونون دئمه یه چوخلو سوزو وار ایدی نه یازیق کی اوره یی ایسته دییی بیر قولاق آسان بلکه ده تاپا بیلمه ییردی . نظره گلیردی همه شه اوزو ایله ایچری سینده دانیشیر . قلم دوستوموز محمد مهراب ین دئدییی کیمی او سوزون قویویا دئیین لردن ایدی . چوخ گومان کی بیر کیمسه اوندان اینجیمه میشدی . یعنی او اینجیتمه میشدی . هامی ایله قارداش واری و ادب – ارکان ایله کئچینردی . دوستلارین خیر – شر لریندن قالمازدی .

اونا ایش تاپماق ایچون دوستلارین بیر نئچه سی اویان – بویانا جان آتسالاردا ؛ تاسف له بیر نتیجه الده ائده بیلمه دی لر ! بو تواضع کار انسان اوز امضاسیندان دولایی بیر سیرا یازی لارین دا " طلبه " امضاسی ایله یازاردی . من امینم او بیلسه ایدی آیریلیغیندا دوستلاری و قلمداشلاری نه چتین لیک لر چکدی لر ؛ اینانیرام قویمازدی اولوم ائوینین باجاسیندان باخسین ! بونودا بیلیریک اولوم حاق دیر . بونودا بیلیریک کی هامیمیزا قسمت اولاجاق . آنجاق هله دوقتور بوداغی نین عومرونون ان بیشمیش و یئتیشمیش چاغلاری ایدی . اونون اولمه یی هله چوخ تئز ایدی . جامعه میز لازیمی قدر اوندان فایدالانانمادی .!!! تانری اونا رحمت ائله یب ؛ قبری نورلا دولسون .

آخشام اذانی – تبریز 23/4/89

نوشتن نظر
نام:
عنوان:
BBCode:
نظر:
كد:*
	من اين نظر را دوستانه جهت تماس ارسال ميكنم

نظرات (1)

Powered by AZCMS